Iloilo City – Ilisipon na lang ang inadlaw sang pagbiyahe sang mga modernized jeepneys sang Western Visayas Transport Cooperative (WVTC) tungod sa padayon nga pagmahal sang presyo sang gatong.
“Inadlaw na lang ang igatiner namon nga magbiyahe diri sa aton nga mga kalsada amo ina ang aton nga ginakasubo. Subong pa lang nga daan, nagapangayo na kami sang pasensiya sa aton nga mga pumuluyo, sa mga commuters,” suno kay WVTC General Manager Halley Alcarde.
“If these fuel prices continue to go up, we will have nothing to do but papahuwayon namon ang amon nga units,” dugang pa ni Alcarde.
Bisan makabaton sila sang P10,000 nga fuel subsidy halin sa gobyerno, ginpabutyag ni Alcarde nga indi ini bastante sa ila operasyon tungod makaigu lang ini para sa duha ka adlaw nga pagbiyahe.
Sa masunod nga semana, ginapanan-aw nga magasaka sa P150 ang kada litro sang krudo tungod sa padayon gihapon nga giyera sa Middle East.
Ginapanindugan ni Alcarde nga piyerde gid sila sa ila operasyon tungod ensakto lang sa pagbakal sang gatong ang income.
Indi sila luyag nga malubong sa kautangan tungod magluwas sa utang sang kooperatiba sa banko tungod sa bayad sa mga units, may mga empleyado sila nga dapat pasuwelduhan, kag gasto sa ila operasyon.
