ILOILO– Naga-coordinate ang Cabatuan police sa kaiping nga mga lugar agud ma-identify ang duha ka suspects nga nag-hold up sa Indian national sa Zone 10, Poblacion, las-10 sang aga kahapon, Hunyo 29.
Suno kay Police Captain Dionisio Estacio, hepe sang Cabatuan Municipal Police Station, las-11:30 na sang aga sang nag-report si Jatinder Singh Raike, 30-anyos sang Jaro nga gin-hold up siya sang duha ka mga lalaki.
Sa pagpangusisa sang police, antes ang insidente, ginasundan na sang duha ka mga suspect nga nakasakay sa motorsiklo ang biktima nga nagasakay man sa motorsiklo.
Sang nagpanaug ang biktima sa iya motorsiklo, nakatyempo ang mga suspect nga magpanghold-up, suno sa police.
Gintayaan sang pusil sang isa sa mga suspect ang Indian national kag nagdeklarar sang hold-up. Nakuha sa iya ang P10,000, suno sa biktima.
Pagkatapos sang insidente, ginsakyan sang isa sa mga suspects ang motorsiklo sang biktima kag nagpalagyo.
Gintawgan pa sang Indian national ang iya upod kag nagpangayo sang bulig agud malagas ang mga suspects, pero wala na nila naabutan.
Padayon nga gina-imbestigaran sang police ang insidente.
