Isa pa ka tiil sang lapsag nga gintaban sang ido sa Roxas City, Capiz gin-utod

ILOILO CITY — Wala na sang magtimbang nga tiil ang lapsag nga babaye nga gin-abandonar sa bakante nga lote kag gintaban sang ido sa Barangay Tiza, Roxas City sang Pebrero 23.

Una nga nautod ang tuo nga tiil sang lapsag sang gintaban sang ido.

Suno kay PSMSg Ramil Arcangeles, spokesperson sang Roxas City Police Station, gin-utod pa gid ang wala nga tiil sang lapsag tubtob sa idalum sang tuhod para indi na maglapta ang rabies sa pilas sang lapsag.

Sa subong, suno kay Arcangeles, estable na ang kondisyon sang lapsag nga yara sa St. Anthony Hospital.

Sa CCTV footage nga na-secure sang police, may nakita nga tricycle pasado la-una sang kaagahon nga nagkadto sa area sa diin ginbilin ang lapsag.

Gina-check sang Roxas City police ang iban nga CCTV cameras para matumod kun sin-o ang nagbilin sa lapsag. –via Angel Mae Ciudad