ILOILO —Makit-an ang karatula nga may nakabutang nga “PRIVATE PROPERTY NO TRESPASSING” sa idalum sang wala pa nahuman nga Aganan flyover sa Pavia.
Ini nga statement nakadirekta sa Department of Public Works and Highways (DPWH) kag International Builders Corporation (IBC) nga kontraktor sang flyover.
Suno kay former Pavia Sangguniang Bayan Member Pyt Trimañez, ginapanag-iyahan sang pamilya Jamotillo ang duta nga natindugan sang proyekto.
Sa nahibaluan ni Trimañez sang konsehal pa siya ginpromisahan sang DPWH ang pamilya Jamotillo nga baklon ang duta sa baylo sang pagpatindog sang flyover sa lugar.
Pero tubtob subong, wala gihapon sang nabaton nga bayad halin sa gobyerno ang pamilya Jamotillo gani nagaprotesta, dugang pa ni Trimañez.
Dugang pa niya, sang nagligad nga adlaw mga inutod nga sanga sang kahoy ang ginbutang sa lugar bilang pagpakita sang protesta sang pamilya Jamotillo sa DPWH.
“BAYARI LANG KAMI”
Nanindugan ang tag-iya sang duta nga natindugan sang porsyon sang Aganan flyover sa Pavia nga indi maka-umpisa liwat ang Department of Public Works and Highways (DPWH) ko indi sila mabayaran.
Ang duta ang ginapanag-iyan sang pamilya Jamotillo.
Suno sa tag-iya sang duta, 2023 pa sang gintatakan nga received sang DPWH ang mga dokumento nga ila ginpasa agud mabayran sila sa duta nga sakop sang gina-obra nga flyover.
Apang tubtob subong suno kay Mrs. Jamotillo wala pa nakabayad ang DPWH sa ila sang P1, 844, 330 sa 1,142 square meters nga nasakop nga duta.
Dugang pa niya nga duha na ka tuig ang nakaligad nga napasa nila ang papeles, pero wala gihapon ang bayad.
Ginapaathag niya nga kon mabayaraan na sila sang DPWH, mahimo na sila maka-obra liwat.
Nagbutang sang karatula ang pamilya Jamotillo sa idalum sang flyover nga “Private Property No Trespassing” nga nagatumod sa DPWH kag conrtactor nga International Builders Corporation (IBC).
