ILOILO CITY — Ginpatawag ni Kasing-kasing Molo Punong Barangay Gemma Calzado si SK Kagawad Lorence Galvez kag isa pa ka SK Kagawad agud istoryahon may kaangtanan sa ila mga posts sa Facebook nga nagapakalain sang imahe sang barangay.
Suno kay Calzado, ginhambalan na niya ang pamilya ni Galvez nga sawayon siya sang iya mga posts sa diin ginapaguwa niya nga magamo ang barangay bisan indi man.
Luyag kuntani ini pasensiyahan na lang sang kapitan pero nagpadayon amo nga ginpatawag niya kahapon si Galvez pagkatapos sang ila separado nga mga sessions agud ma-istorya.
Magluwas kay Galvez may isa pa ka SK Kagawad nga ginpatawag ang kapitan.
Una nga ginpamangkot ni Calzado ang isa ka SK Kagawad nga nagsabat, “Wala to Kap,” sa mahinay nga tono.
Sang ginpamangkot naman si Galvez nagsabat siya nga diretso niya nga mag-post sa iya Facebook account kag gintaasan sang tingog ang kapitan.
Tungod “gin-highblood” na ang kapitan, kon ano na lang ang iya napudyutan, nga amo ang pakaw sang silhig nga bukog, kag nalampusan sa agtang ang SK Kagawad. Nasisi ang wala nga parte sang agtang sang tagreklamo.
Indi na madumduman ni Calzado ang masunod nga nagkalatabo tungod naglain na ang iya pamatyag.
Pagkatapos sang natabu, ginpa-blotter ini sang SK Kagawad amo nga gin-detain sa Molo police station si Calzado.
Ginaproseso na ang pagpasaka sang kaso batok kay Calzado.
Ginpabutyag naman sang Kapitan nga ma-file siya sang kaso batok sa SK Kagawad sa pagpakahuya sa iya.
Sang ginpamangkot si Calzado kon ano ang buot-silingon sang pahayag ni Congresswoman Julienne Baronda nga supportive si Galvez sa programa sang kongresista, ginklaro niya nga wala sang pulitika sa insidente sa tunga nila sang SK kagawad. — Aksyon Maria Kayla Tingzon
