ILOILO — Patay ang laborer sang ginbuno sang kaupod niya inom sa Barangay Jaguimitan, Passi City kagab-i, Oktubre 25.
Ginkilala ang napatay kay alyas Mic may pilas sa wala nga portion sang ilok.
Suno kay Police Captain Ma Rosarie Miranda, Deputy Chief of Police kag spokesperson sang Passi City Police Station, magka-upod nga naga-inum inom ang biktima kag ang suspek nga ginkilala kay alyas Ry, residente man sang nasambit nga lugar.
Kaupod man ni Mic kag Ry inom ang iban pa nila nga kaupdanan nga laborer.
Sa pagpaathag ni Captain Miranda, naghagaray ang mga laborer nga mapabaylehan sang naubos na ang ila gina-inom.
Samtang nagahimos pakadto sa baylehan, nakita sang isa nila ka upod nga may dala nga kutsilyo ang suspek rason nga iya ginsita kag ginhambalan nga ibilin sa tiangge.
Wala ginbilin sang suspek ang iya kutsilyo sa baylo gintuyo pa niya nga bun-on ang nagsita sa iya.
Wala ma-igo ang una niya ginbuno, apang naigo sa tuo nga kamot ang isa pa nila ka upod nga ginkilala kay alyas Lovy.
Samtang ang napatay ang wala nakapanginlaman tungod naglakat siya nga nagalantaw sang iya cellphone sang ginbuno.
Nadakpan sa hot pursuit ang suspek kag pasakaan sang kaso nga murder, suno sa pulis. — Aksyon Angel Mae Ciudad
