ILOILO CITY — Malapit na nga makalab-ut sa tunga-tunga sang Iloilo Strait ang lalaki nga nagtabok halin sa Fort San Pedro pa-Guimaras paagi sa paglangoy sang na-rescue sang mga personnel sang Philippine Coast Guard Iloilo kahapon, Hulyo 8.
Suno kay Coast Guard Iloilo Station, spokesperson Ensign Marvince Genzola, mga las-12:30 nakabaton sila sang report nga may lalaki nga nagtabok padulong sa Guimaras kag nagakupo lang sa kahoy samtang nagalangoy.
Ginrespondehan sang PCG ang lalaki kag na-rescue siya sang ginabanta 45. 72 meters ang kalayauon halin sa shoreline sang Iloilo City.
Ginpabutyag ni Genzola nga nagtawag ang utod nga babaye kag ginkilala ang lalaki kay Joshua Mondejar, 22-anyos kag residente sa Brgy. Guiwanon, Nueva Valencia, Guimaras pero nagatiner na sa Molo.
Ini ang ikaduha na nga tion nga gintuyo sang amo nga lalaki nga tabukon ang Iloilo pa-Guimaras tungod luyag niya nga magpauli sa Nueva Valencia.
Sang Mayo 3, 2025, gintuyo man niya tabukon ang kadagatan halin sa Poblacion South, Oton pa-Guimaras. Nagsakay siya sa improvised balsa kag yara na sa tunga sang lawod sang na-rescue.
