ILOILO — Patay na sang nakita ang 57-anyos nga lalaki sang ginlampusan sang kahoy sang iya upod sa ilimnan sa Sitio Bontoc, Barangay Buga, Igbaras kahapon sang kaagahon, Mayo 30.
Suno kay Police Captain Francis Donne Lomahan, hepe sang Igbaras Municipal Police Station, nagapreparar para sa ulihi nga adlaw sang Flores de Mayo ang mga tawo sa barangay sang naghagaday ang suspect nga si Junjun kag biktima nga si Jerry upod sa iban pa nga mag-inum-inom sa guwa sang chapel.
Tungod nagagab-i na, nag-amat-amat pauli ang iban nila nga upod tubtob nga sila nalang nga duha ang nabilin.
Sa pagpangusisa sang police, may nakakita pa sa biktima nga nagahigada sa kahilamunan kag sa suspect nga nagabitbit sang kahoy pero wala nasapakan sa pagpanumdom nga tulog lang ang biktima kag wala man sang komosyon nga nabati-an.
Pagkaaga sang nasapwan ang biktima, nakita man ang suspect nga nagakatulog sa sulod sang chapel. Nakita man sa malapit nga lugar ang kahoy nga nabulit sang dugo nga ginapatihan iya gingamit sa pagpanglampos
Nakaagum sang pilas sang tuo nga dulunggan tuga sang pagkalampos kag ginpa-autopsy na agud mahibaluan ang gintunaan sang iya kamatayon. — Aksyon Paula Elambayo
