ILOILO — Nagtanyag sang libre nga sakay ang trike driver sa University of the Philippines – Visayas (UPV) para sa mga estudyante, staff kag bug-os nga UPV community bilang pagpasalamat sa pagkapasar sang iya bata sa March 2025 Licensure Exam for Teachers (LET).
Suno sa driver, nangin palaagyan ang pagsakay sang mga katapo sang UPV community agud mapa-eskuwela kag mapatapos niya ang iya bata.
Sang Sabado, Mayo 24 ginpaguwa ang resulta sang March 2025 LET kag isa sa mga nakapasar ang bata sang nasambit nga driver.
“SI TATAY VERY SUPPORTIVE, MAPISAN GID SIYA”
Tuman ang kalipay kag ginapabugal ni Patricia Ella Nor Cerenado sang Barangay Malagyan, Miagao ang ginhimo sang iya amay nga tricycle driver nga nagtanyag sang libre sakay bilang pasalamat sa iya pagkapasar sa March 2025 Licensure Examination for Teachers.
Suno kay Cerenado, yara siya sang iya pamilya sa ila balay sang nagguwa ang resulta sang board exam sang Mayo 23.
Las-nueve sang aga sang nagsugod biyahe ang iya amay pagkatapos nila magbaligya sang sud-an sa paradahan sang mga tricycle.
Wala sang ideya si Cerenado nga matanyag sang libre sakay ang iya amay.
Nahibaluan na lang ini ni Cerenado sa social media, sang gin-tag siya sang iya mga abyan kag kilala sa Facebook post sang isa sa mga pasahero nga naka-avail sang libre sakay.
Suno kay Cerenado, mapisan kag nagahimakas ang iya amay agud mahatagan sila sang maayo nga kabuhi kag makatapos sa pag-eskwela.
Para kay Cerenado, “good provider” kag “the best father” ang iya amay.
Si Cerenado ang subang sa tatlo ka mag-ulutod. Naga-eskwela man sa kolehiyo ang iya manghod nga babaye kag lalaki.
Nag-graduate si Cerenado nga Magna Cum Laude sa kurso nga Bachelor of Science in Secondary Education Major in Filipino sa West Visayas State University Main Campus.
