ILOILO CITY – Preso sa Police Station 1 ang magpamilya sang nadakpan sa drug buy bust operation sa Barangay Hipodromo, City Proper kagab-i.
Ginkilala ni Police Captain Mavin Laraño, OIC sang Police Station 1 ang mga nadakpan kanday Roger Sabado, 59; kag kabataan niya nga kanday Dexter, 27; kag Romar 35, nga lunsay mga residente sang nasambit nga barangay.
Na-recover sa mga nadakpan ang 10 ka sachets sang suspected shabu kag P2,500 nga buy bust money.
Suno kay Laraño, malapit isa ka bulan nga gin-monitor ang illegal activities sang magpamilya antes natigayon ang operasyon. Base sa monitoring sang kapulisan, naga-operate ang mag-amay sa bug-os nga city proper kag diri lang sa siyudad nagakuha sang supply sang illegal nga druga.
Gintinguhaan sang Aksyon Radyo Iloilo nga makuhaan sang pahayag ang mga nadakpan pero nagpamalibad sila nga magpa-interview.
