ILOILO — Patay ang mag-iloy nga sakay sang motorisklo sang nakabunggo sa sumalang nga van sa Barangay Siempreviva, San Dionisio kahapon, Mayo 30.
Suno kay Police Captain Edward Villanis, hepe sang San Dionisio Municipal Police Station, gin-agaw sang motorisklo nga ginamaneho ni alyas Maria ang linya sang van nga iya sumalang amo nga iya nabungguan.
Tungod sa impact nakaagum sang pilas sa ulo kag nagkalain-lain nga parte sang lawas si Maria kag napilasan mn ang iya lima ka tuig nga bata nga lalaki nga nagaangkas.
Gindala pa sa ospital si Maria pero gindeklarar nga dead-on-arrival. Gin-refer pa sa Western Visayas Medical Center ang bata niya agud mabulong pero napatay man pag-abot sa ospital.
Guba ang wala nga porsyon sang unahan nga bumper kag headlight sang van.
Sa pagpangusisa sang police, naka-inum si Maria nga halin sa beach resort.
Nakita man sang driver sang van kag iban pa nga motorista nga nagasunod sa iya nga nagadunglay-dunglay siya kag nagakapiyungan.
Yara sa kustodiya sang San Dionisio police ang driver sang van. — Aksyon Maria Kayla Tingzon
