ILOILO CITY — Nakuhaan sang P1,360,000 nga balor sang suspected shabu ang magparyentehanay sa drug buy bust operation sa Brgy. Muelle Loney, City Proper kahapon, Hunyo 1.
Ginkilala ang mga main subjects kanday alyas Totong Laway kag Totong Libat nga magpakaisa, residente sang Brgy. Muelle Loney samtang dakup man ang ila paryente nga si alyas Nonoy nga taga-San Enrique.
Suno kay Police Captain Ryan Christ Inot, officer-in-charge sang Iloilo City Drug Enforcement Unit (CDEU), ginatudlo nga distributor sang illegal drugs sa barangay ang magpakaisa nga may madamo na sang koneksyon.
Dugang pa ni Inot, “very alarming” ang nagakatabo sa barangay tungod madamo ang nagakadto agud magbakal sang illegal drugs.
Base sa monitoring sang police, nagdugay sang duha ka bulan ang pag-monitor sa mga subject nga masami tricycle driver ang mga ginabaligyaan sang illegal drugs.
Lima ka gagmay nga sachets kag apat ka dalagku nga sachets sang suspected shabu ang na-recover sa mga subject nga yara sa 200 grams ang kabug-aton. — Aksyon Paula Elambayo
