ILOILO CITY — Pilason ang magulang sang nabun-an sang iya manghod pagkatapos ang ginamo sa Brgy. Simon Ledesma, Jaro las-12:20 kaina sang kaagahon.
Suno kay Corporal Kish Talabero, imbestigador sang Police Station 9 sa Jaro, nag-abot sa ila balay nga nakainom sang makahulubog nga ilimnon ang magulang nga si Ry, 21-anyos, kag nagpanyapon.
Samtang nagakaon, nagakatulugan si Ry gani nagmuno ang manghod nga si Ken, 15-anyos, nga magpahuway na lang siya, suno sa pulis.
Pagkatapos sini, gingarit-garit ni Ry si Ken. Ini ang rason nga na-impito si Ken kag nag-inaway sila tubtob ginsiko siya ni Ry, suno sa pulis.
Ginpabutyag sang pulis nga nagkuha sang tubo si Ry para ilampos sa iya nga utod gani nagkuha man sang kutsilyo si Ken.
Pahugon lang kuntani ni Ken ang iya magulang para mag-untat pero gindakop ni Ry ang kutsilyo gani napilasan. May mga pilas man sa lawas si Ry tungod sang ginamo.
Ginrespondehan sang Iloilo City Emergency Responder (ICER) kag ginbulong ang pilas sang biktima.
Indi na magpasaka sang kaso ang pamilya sa suspek.
