ILOILO — Patay ang 18-anyos nga magulang sang ginbuno sang iya 15-anyos nga manghod sa isa ka barangay sa Balasan kahapon, Hulyo 22.
Suno kay Police Captain Alexander Lauron sang Balasan Municipal Police Station, gulpi lang nag-abut ang magulang sa ila balay kag ginpasibangdan ang iya mga pakaisa nga gintago ang iya nga vape.
Sang nabatian sang manghod ang tingog sang magulang, naguwa siya sa kwarto kag nagbaisay sila, suno sa police.
Dugang ni Lauron, gintambagan pa sang amay ang mag-utod pero ginsumbag siya sang magulang tubtob natumba.
Ginpunggan naman sang manghod ang iya magulang pero ginsumbag man siya sa ulo. May ginasuksok nga improvised nga sprocket sang motor sa iya kamot ang magulang rason nga nagpalangdulom ang panulukan sang manghod kag gilayon nagkuha sang kutsilyo kag ginbuno sa dughan ang iya magulang, suno sa police.
Gindala pa sa ospital ang biktima pero gindeklarar nga dead-on-arrival.
Ginpahayag ni Lauron nga wala sang plano nga magpasaka sang kaso ang amay batok sa suspect.
Sa subong yara sa Municipal Social Welfare and Development Office (MSWDO) ang suspect kag ginpaidalum sa psychological counseling.
