ILOILO — Nakuhaan sang P476,000 nga balor sang suspected shabu ang 26-anyos nga senior high school student sa Barangay Alibunan, Calinog kahapon, Disyembre 17.
Suno kay Police Major Myles Dieron, hepe sang Calinog Municipal Police Station, na-monitor ang mga transaksyon sang subject nga si alyas Koykoy, residente sang nasambit nga barangay tungod sa impormasyon nga may mga pamatan-on kag mga classmates niya nga menor-de-edad nga nagakadto sa iya balay agud magbakal kag maggamit sang illegal nga druga.
Dugang ni Dieron, may mga out of school youth nga halin sa Dueñas nga nagakadto sa ila barangay agud magbakal sang illegal nga druga.
May nagadul-ong naman sang supply sang illegal nga druga kay Koykoy nga halin sa Iloilo City.
Ginahibalo pa sang kapulisan kon may gintugyanan si Koykoy sa iya mga abyan sa pagpadayon sang pagbaligya sang illegal nga druga. — Aksyon Maria Kayola Tingzon
