ILOILO — Dakop ang subject kag nakuhaan sang malapit tunga sa million ka pesos nga balor sang suspected shabu sa buy bust sa Barangay Poblacion Delgado, Calinog las-8:50 kagab-i, Agosto 7.
Suno kay PMAJ Myles Dieron, hepe sang Calinog MPS, naglawig sang duha ka bulan ang monitoring sa subject nga si alyas Benjie, residente man sang Poblacion Delgado, antes gin-operate.
Base sa monitoring sang police, nagalab-ot si Benjie sa Bingawan, Passi City kag Tapaz, Capiz sa pagbaligya sang illegal nga druga.
Dugang ni Major Dieron, sa Iloilo City nagakuha sang supply ang subject.
Wala naman sang criminal record ukon reklamo sa barangay nga gina-ulamiran si Benjie.
Nakuha sa subject ang suspected shabu nga nagabug-at sang 70 grams kag may standard drug price nga P476,000. —via Maria Kayla Tingzon
