ILOILO CITY — Indi kuwarta ang unod sang maleta nga duag violet nga nakit-an sa higad sang dalan sa Jereos St. Brgy. Burgos, La Paz kahapon, Nobyembre 17.
Nabutang sa poste sang kuryente ang maleta nga may naka-tape nga papel kag may nakasulat nga, “Maleta ni Zaldy Co”.
Suno kay Police Captain Jeffrey Delgado, officer-in-charge sang Iloilo City Police Station 2, may concerned citizen nga nagtawag sa ila kag nagpahibalo nga may nakit-an nga maleta sa higad sang dalan.
Natyempuhan nga may pulis nga nakalabay sa area kag liwat nagtawag sa police station. Naka-off duty ang pulis nga na-assign sa headquarters sang ICPO, suno kay Delgado.
Sang nagresponder ang mga pulis sang La Paz Police Station, nabuksan na ang maleta kag nakit-an nga libro, Christmas lights kag basura ang unod.
Sa paglantaw sang mga pulis, ginbilin ang maleta sa lugar gani gina-check ang lugar kon may mga CCTV cameras agud mahibaluan kon sin-o ang may kahimuan sini.
Liwat nagapanugyan ang mga pulis nga gilayon mag-report kon may masiplatan nga makaduluda nga butang.
Matandaan nga ginbuyagyag ni resigned Congressman Zaldy Co nga minaleta sang kuwarta ang iya gin-deliver kanday President Ferdinand Marcos, Jr. kag former House Speaker Martin Romualdez nga budget insertions sa 2025 national budget. — Aksyon Paula Elambayo
