ILOILO — Pilason ang mangunguma sang ginbuno sang iya upod sa ilimnan sa Sitio Markabubog, Brgy. Balunos, Anilao, las-7:30 kagab-i.
Suno kay Police Captain Kate B. Apitan, officer-in-charge sang Anilao Municipal Police Station, nag-inom-inom sa payag sa nabukid nga parte sang nasambit nga lugar ang biktima nga si alyas Dondon, 38-anyos, suspek nga si alyas Bukay, 40-anyos, kag isa pa ka upod nga si Jerry, residente sa amo nga lugar.
Naglisensya ang biktima nga magpangihi pero duguon na pagbalik sa payag kag nagpanugid kay Jerry nga ginbuno siya ni Bukay.
Gilayon nga gindala sa ospital si Dondon nga may pilas sa dughan kag tiyan. Indi man madalom ang mga pilas sang biktima, suno sa police.
Ginalantaw sang police nga hinubog ang motibo sa pagbuno.
Napalagyo ang suspek, suno sa police.
Las-7:45 kaina sang aga, nakabaton sang report ang police nga may nasapwan patay sa idalom sang paho kag na-identify nga si Bukay. Wala sang pilas si Bukay. — ARI trainee reporter Robert Nietes
