Mangunguma pilason sang gintiro sa iya balay sa Estancia; Suspek ginatudlo una nga nangawat sa kaiping nga barangay

ILOILO – Pilason ang mangunguma sang gintiro sa sulod sang iya balay sa Brgy. Villa Pani-an, Estancia sang Nobyembre 22 sang kaagahon.

Suno kay Police Corporal Cezar Medina, imbestigador sang Estancia Municipal Police Station, gintuyo nga kawatan sang suspek ang balay sang biktima nga si si alyas Jer, 59- anyos.

Nakabugtaw ang biktima agud mangihi apang nakita niya nga gina-ukay sang suspek ang drawer sa sala sang balay. Ginsinggitan sang biktima ang suspek apang gintiro siya kag naigo sa tiyan.

Gilayon nga nagpalagyo ang suspek.

Padayon nga ginabulong sa ospital ang biktima.

Dugang ni Medina, antes natabo ang pagsulod sa balay sang biktima, una na nga ginsulod sang suspek ang welding shop sa Brgy. Tabu-an nga kaiping sang Brgy. Pani-an, mga la-1:40 kahapon sang kaagahon.

Nakita sa CCTV footage nga ginkuha sang suspek ang welding machine. — ARI trainee Robert Nietes