ILOILO — Patay na sang nasapwan ang manug-uling sa suba sa Brgy. Dorong-an, Tigbauan kahapon, Agosto 31.
Suno kay Punong Barangay Joel Cabalar sang Dorong-an, nakit-an sang ila chief tanod ang bangkay sang manug-uling nga nagakulob sa higad sang suba.
Gilayon nagpahibalo ang tanod sa barangay gani nagresponde ang kapulisan.
Sa pagpangusisa ni Cabalar, halin sa balay sang iya mga paryente sa Brgy. Sermon ang manug-uling tungod nag-inum inom sang Biyernes sang gab-i. Ginpunggan sang mga paryente nga magpauli ang manug-uling tungod naga-ulan.
Ginalantaw sang pamilya nga nahulog sa suba ang ila himata tungod nakainom sang makahulubog nga ilimnon gani nalumos.
Gina-imbestigaran sang police ang insidente. — Aksyon Paula Elambayo
