Manugbantay sang bugasan sa Oton gin-hold up

ILOILO — Ginabanta sa P26,000 nga kwarta ang nakuha sang gin-hold-up ang bugasan sa Brgy. Poblacion South, Oton sang weekend.

Suno kay Police Lieutenant Colonel Abner Jordan, officer-in-charge sang Oton Municipal Police Station, nagapungko sa sulod sang bugasan ang lalaki nga manugbantay sang nagsulod ang suspek kag gintayaan sang kutsilyo.

Nakuha sang suspek ang kwarta sang bugasan nga yara sa kaha kag nagpalagyo.

Indi pamilyar sa biktima ang itsura sang suspek suno sa police.

Nagapadayon ang imbestigasyon sang police sa natabo agud mahibaluan kon may mga kaupdanan ang suspek sa ginhimo nga krimen. — Aksyon Paula Elambayo