Masobra 80% sang mga barangay sa probinsya sang Iloilo nagapabilin nga drug-cleared — IPPO

ILOILO – Masobra 80 percent sang mga barangays sa probinsiya sang Iloilo ang nagapabilin nga hilway sa illegal nga druga, suno kay Iloilo Police Provincial Office (IPPO) Director Police Colonel Ronaldo Palomo.

“Actually ang aton mga kabanwahanan, more than 80 percent na sang kabaranggayan ang cleared na sa illegal drugs. Ini na-verify na sang PDEA kag gin-adjudicate na sang PDEA nga ini nga mga kabaranggayan mga cleared na sa illegal nga druga,” pahayag ni Palomo.

Ginabantayan lang suno sa iya sang kapulisan sa probinsiya, ang mga Ilonggo nga nagaguwa kag nagasulod sa probinsiya agud magbantay sa sitwasyon kag nagahingalit nga makapasulod sang illegal nga druga halin sa iban nga lugar.

“Ginatan-aw lang gid naton dira ang nagasurulod sa probinsiya sang Iloilo nga kumbaga nagasulod-nagaguwa-nagasulod [kag] nagatan-aw bala sa sitwasyon. Daw mga guerilla operations ang gina-ubra nila sa probinsiya sang Iloilo. Ini’ng mga tawo actually mga Ilonggo man but they are coming from different [places] sa siyudad sang Iloilo kag sa siyudad sang Bacolod,” dugang ni Palomo.

Nagasalig sila suno sa iya sa report halin sa intelligence community nga natipon sa mga nadakpan sa anti-illegal drug operations.

“Ang aton nga probinsiya sang Iloilo naga-maintain gihapon sang more than 80 percent nga drug-free nga mga barangays. Ina ginapasalamatan naton kag ginapangayuan namon gid ina bulig sa mga pumuluyo nga tutukan naton ang kada barangay naton kag indi na dapat kita makabalik sa before pa during the time of [former] President Rodrigo Duterte nga magabalik naman ang illegal nga druga sa aton nga probinsiya,” suno kay PCOL Palomo.

Una na nga ginpahayag ni Iloilo Governor Arthur Defensor, Jr., nga nagdamo ang operasyon batuk sa illegal nga druga nga nagresulta sa pagkadakop sang mga high value individuals.