ILOILO — Naglab-ot sa P577,320 nga balor sang suspected shabu ang nakuha sa subject sa drug buy bust operation sa Barangay Balantian, Balasan kahapon, Oktubre 26.
Subject sa operasyon si alyas Ron, 35-anyos nga residente sang nasambit nga barangay.
Suno kay Police Lieutenant Dionisio Fernandez, deputy chief of police sang Balasan Municipal Police Station, gin-operate ang subject sang nakabaton sang impormasyon ang kapulisan sa Balasan may kaangtanan sa iya illegal drug activities.
Ginpabutyag ni Fernandez nga ini ang una nga tion nga nadakpan sa anti-illegal drug operation ang subject pero may impormasyon nga nakalab-ot sa ila nga nagaserbe siya runner sang iban pa nga drug subjects sang una.
Sa malapit duha ka bulan nga monitoring sang Balasan police, nakumpirmar man nga sa Estancia nagahalin ang illegal nga druga nga ginabaligya sang subject sa Balasan kag kaiping pa nga mga banwa.
Ginabanta 84.9 grams sang suspected shabu ang na-recover sa operasyon. Magluwas sini may nakuha man nga improvised tooter sa posesyon sang subject. — Aksyon Maria Kayla Tingzon
