ILOILO — Naglab-ot sa P578,000 nga balor sang suspected shabu ang nakuha sa high value individual nga nadakpan sa drug bust operation sa Barangay Ungka II, Pavia kahapon, Sept. 18.
Suno kay Police Lieutenant Gabriel Manguera, deputy chief sang Provincial Drug Enforcement Unit (PDEU), sa siyudad sang Iloilo pa nagahalin ang supply sang illegal nga druga nga ginabaligya sang subject nga si alyas Paulo, 40-anyos, nga residente sang Brgy. Balabag, Pavia.
Dugang ni Manguera, nagalab-ot sa Sta. Barbara, Leganes, San Miguel kag bisan sa siyudad sang Iloilo nga source niya, sa pagbaligya sang illegal nga druga.
Naglab-ot sa isa ka bulan ang monitoring sa subject tubtob nadakpan.
Nakuha sa subject ang isa ka sachet nga amo ang buy bust item kag dugang nga tatlo ka dalagko nga pinutos sang suspected shabu sa iya posesyon nga ginabanta nagabug-at sang 85 gramos. — Aksyon Maria Kayla Tingzon
