ILOILO — Nagapabilin sa Intensive Care Unit (ICU) sang West Visayas State University Medical Center (WVSU-MC) ang 24-anyos nga mekaniko sang ginbuno sang 26-anyos nga construction worker sa Merlo Street, Barangay Zone II, Sta. Barbara mga las-10:30 kagab-i.
Suno sa amay sang biktima, naghapit ang iya bata sa food fest sa banwa para magbakal sang sud-an.
Samtang nagabakal, nasalapay sang biktima ang suspetsado. Sa pagpanumdom sang biktima nga wala man ginabatyag sang suspect ang natabu, naglakat siya.
Samtang nagalakat pabalik sa iya motorsiklo upod ang duha niya ka mga kabulig sa ubra, natalupangdan sang biktma nga ginasundan siya sang apat ka mga lalaki lakip ang suspect.
Sang nalab-ot sang suspect kag iya mga kaupdanan ang biktima, ginbuno siya sang makapila ka beses gamit ang kutsilyo.
Ginhambalan naman sang biktima ang duha niya ka mga kabulig nga maglikaw sa paglantaw nga sila man ang sarusuhon sang suspect kag iya mga upod.
Duha ang nadakpan sang mga pulis nga nagapatrolya sa lugar samtang nakapalagyo ang duha pa.
Na-recover sa suspect ang kutsilyo nga iya gingamit.
Sa alegasyon naman sang suspect sa mga pulis, ginhaboy sila sang bato sang biktima amo nga ginlagas nila.
Gindala sa Western Visayas Sanitarium ang biktima pero gin-refer sa WVSU-MC.
Sang gin-examine sang doktor, 11 ang pilas sang biktima sa dughan, kilid kag kalabanan sa likod.
Preso ang suspetsado sa Sta. Barbara Municipal Police Station kag natalana pasakaan sang kaso nga frustrated murder. — Aksyon Maria Kayla Tingzon
