ILOILO CITY — Nagapabilin nga at large ang suspek nga menor-de-edad nga nagtiro sa kapareho nga menor sa Boulevard, Molo sang Sabado sang hapon, Oktubre 25.
Suspek si alyas Carl 16- anyos samtang biktima si alyas Toto, 16- anyos, residente sang amo man nga lugar.
Suno kay Police Captain Ryan Christ Inot, officer-in-charge sang Molo Police, nagalakat sa baybay si Toto sang ginpalapitan ni Carl kag ginkomprontar.
May daan na nga away ang suspek kag ang biktima, suno sa pulis.
May komosyon nga natabo tubtob nga ginduhol sang upod ni Carl nga si Nonoy, 19- anyos, ang 12 guage homemade shotgun kag gintiro si Toto.
Napilasan sa tuo nga hita kag tiil si Toto samtang gilayon nga nagpalagyo si Carl kag mga upod.
Nahibaluan sang pulis nga bolitas ang gingamit nga bala sang suspek sang pagtiro sa biktima.
May record nga homicide si Carl sa Molo police sa kaso nga homice sang July subong nga tuig apang nakaguwa sa Balay Dalayunan tungod nakapyansa.
Pasakaan man sang kaso si Nonoy nga nagduhol sang armas kay Carl, suno sa pulis.
Natalana nga ipasaka buwas ang kaso nga frustrated homicide batok sa suspek, suno sa pulis. — ARI trainee Robert Nietes
