Mga atleta sa Iloilo province nga nagdaug sang gold sa Palarong Pambansa 2025 makabaton sang cah incentives halin sa provincial gov’t

Ginkumpirmar ni Mr. Ray Cabarles, sports development officer 4 sang Iloilo Provincial Government nga makabaton sang cash incentives ang mga Ilonggo athletes nga nakakuha sang medalya sa Palarong Pambansa 2025.

Ginpaathag ni Cabarles nga may ordinansa ang probinsiya nga nagaplastar kun pila ang cash incentive nga makuha sang atleta, depende sa klase kag kadamuon sang medalya nga iya natipon sa kompetisyon.

Kun sa Western Visayas Regional Athletic Association (WVRAA) meet nagdaog ang atleta, P5,000 ang iya makuha sa kada gold medal; P3,000 sa silver; kag P2,000 sa kada bronze medal.

Kun sa Palarong Pambansa naman, P8,000 sa kada gold medal ang makuha nga incentive sang atleta; P6,000 sa silver; kag P4,000 sa bronze medal.

Gin-athag ni Cabarles nga ang mga sporting events lang nga sanctioned sang DepEd, Philippine Sports Commission, kag Olympic Committee ang ginakilala para makabaton sang incentive ang atleta. — Aksyon Khenjo Terco