ILOILO CITY — Indi peligroso kag indi maka-apekto sa structural integrity sang Sta. Ana Parish sa Molo ang nakita nga minor cracks sa dingding sang simbahan.
Ini base sa statement sang Archdiocese of Jaro sang naghimo sang inspection sa simbahan makaligad ang linog sa Iloilo City sang Septiyembre 30 sang gab-i.
Una na nga ginmandu ni Archbishop Most Rev. Midyphil B. Billones, D.D., ang pag-check sa structure sang mga simbahan sa idalom sang Archdiocese of Jaro agud masiguro nga safe ang mga sumilimba.
Bilang pagsunod sa direktiba, naghimo sang inspection si Rev. Msgr. Joemarie Delgado, PC, Priest Moderator sang Molo Church paagi sa bulig sang A&A Builders, nga ginpangunahan ni Engr. Antonio F. Belarga, ASEAN Engineer, kaupod si Ar. Rodolfo Depatillo, Engr. Allan S. Dumalay, kag mga estudyante halin sa Western Institute of Technology.
Naghimo sila sang on-site structural inspection sa interior sang simbahan agud ma-evaluate ang kondisyon makaligad ang pagtay-ug tungod sa linog.
Sa pihak sang pagpasiguro sang simbahan kag mga professional nga safe ang istruktura, ginapanugyanan gihapon ang mga sumilimba kag mga pilgrims nga mangin vigilant kag iprayoridad ang safety sa tanan nga tion.
Ang inspection pareho nga preventive kag proactive measures sang simbahan nga maproteksyunan ang mga tumulu-o kag mapreserba ang bantog nga religious kag cultural landmarks sang Iloilo.
