Sayluhon sa mga public plazas kag esplanade ang mga buhi pa nga palma nga gintanum halin sa Esplanade 1 tubtob sa Ungka, Jaro.
Ini tungod ilisan sang Dita trees ang mga palma suno kay General Services Office head Engr. Neil Ravena.
Amat-amat naman nga ginpanggabot sang Iloilo city government ang mga laya nga palma.
Sa pagpangusisa sang Aksyon Radyo Iloilo news team, nagabalor ang kada palma sang P6,000. Sa 335 ka mga palma nga ginpangtanum sa siyudad, ginabanta sa P2 million ang balor sini.
Samtang, nagabalor naman sang tag-P100 ang Dita tree. Magakinahanglan sang 400 tubtob 500 ka Dita trees ang Iloilo city government.
Ang Dita tree nga may scientific name nga Alstonia scholaris ukon kilala man sa tawag nga scholar tree ukon blackboard tree, ang ginrekomendar ni landscape Architect Paulo Alcazaren tungod wala sini ginaguba ang dalan, may handong ang iya dahon, kag makahatag sang kabugnaw sa Diversion Road. — via Aksyon Justice Savannah Pamplona
