ILOILO — Ginkatingala ni Association of Taxi Operators in Panay (ATOP) President Perfecto Yap ang nangin desisyon sang Local Government Unit (LGU) sang Dumangas nga indi na pwede maka-pick up sang pasahero ang mga taxi kag modernized jeep sa sulod sang Dumangas Port.
Suno kay Yap, sang ginsugilanon niya si Dumangas SB Member Nelson Nalleca, ginpahayag sang konsehal nga na-aprubahan na nga tubtob na lang sa Dumangas Trading Center sa Brgy. Dacutan ang mga taxi kag modernized jeep kag diri man sila pwede maka-pick up sang pasahero.
Base naman sa pagpangusisa ni Yap sa iban nga mga taxi driver, ginapabayad gihapon sila kun magkuha sang pasahero sa port. Ang matabo suno sa iya, amo nga kinahanglan pa sang pasahero nga magsakay sa tricycle halin sa port tubtob sa gindesignar nga pick up point sang mga taxi kag modernized jeep.
Ginapanindugan ni Yap nga dapat pasugtan sila nga makapasakay sang pasahero sa port tungod pwede sila maka-pick up sang pasahero sa diin man nga lugar sa Panay, base sa ila prangkisa.
Gina-propose niya nga dapat hatagan lang sang separado nga pila ang mga taxi kag tricycle, kag ang pasahero na ang bahala nga magpili kun diin sila masakay.
Dugang niya, mangin indi komportable ang mga pasahero kun ipatuman ini nga sistema.
Mangayo pa sang dugang nga kaathagan si Yap kun pwede sila gihapon makadul-ong sang pasahero tubtob sa sulod sang port tungod kulang pa suno sa iya ang mga detalye nga ginhatag ni Nalleca.
Nahibaluan nga madugay na nga isyu ang pagpanukot sang mga tricycle driver sa mga taxi driver nga naga-pick up sang pasahero sa Dumangas port.
