Pilason ang miyembro sang Philippine Army sa engkwentro sa tunga sang mga ginapatihan miyembro sang nagbungkag nga Central Front Komiteng Rehiyon Panay sa tri-boundaries sang Brgy. Agpalali, Brgy. Artuz kag Brgy. Tabon sa Tapaz, Capiz.
Suno kay Colonel Erwin Rommel Lamzon, spokesperson sang Division Public Affairs Office sang Philippine Army, nakabaton sila sang impormasyon halin sa komunidad sa lugar nga may mga nasiplatan nga rebelde.
Tungod sini, naghimo sang operasyon ang 301st Brigade, 12th Infantry Battalion, 82nd IB, 61st Infantry Battalion kag Philippine Air Force tubtob natabo ang una nga engkwentro pasado las-2:00 kahapon sang kaagahon, Agosto 22.
Pasado las-9:30 kaina sang aga sang natabo ang ikaduha nga hugnat sa Brgy. Agpalali.
Naglawig sang pito ka oras ang engkwentro sa tunga sang Philippine Army kag mga miyembro sang Regional Sentro de Gravedad kag Central Front Komiteng Rehiyon Panay.
Na-recover sa lugar ang duha ka M14 rifle, isa ka AK47 rifle kag grand rifle.
Napilasan sa tuo nga abaga ang miyembro sang Phil. Army, suno kay Colonel Lamzon.
Nagapadayon ang hot pursuit operation sang Philippine Army sa lugar. — Aksyon Paula Elambayo
