Mosobra P1 million nga balor sang suspected shabu na-recover sa drug buy bust operation sa Lanit, Jaro

ILOILO CITY — Na-recover ang P1,020,000 nga balor sang illegal drugs sa drug buy bust operation sa Brgy. Lanit, Jaro las-12:50 kaina sang kaagahon.

Ginkilala ang subject kay Praud Joan Animas alyas El-el, sang nasambit nga barangay.

Na-recover kay Animas ang tatlo ka plastic sachets sang suspected shabu nga buy bust items, lima (5) ka magagmay nga plastic sachets sang suspected shabu, kag isa (1) ka daku nga sachet sang suspected shabu. Yara na si Animas sa custody sang Jaro police.

Ginatinguhaan sang Aksyon Radyo Iloilo nga makuhaan sang statement ang subject.

INDI TAGA-BRGY. LANIT

Boarder lang kag indi tumandok sang Brgy. Lanit, Jaro ang nadakpan sa drug buy bust operation sa nasambit nga barangay kaina sang kaagahon.

Suno kay Barangay Kagawad Jimmy Gonzales, chairman sang Peace and Order, wala sang record sa barangay ang subject nga ginkilala kay Animas may kaangtanan sa illegal drugs.

Indi man pamilyar ang mga barangay officials kay Animas tungod pila pa lang siya ka bulan nga naga-board sa lugar.

Gin-athag man ni Gonzales nga wala naka-coordinate sa ila ang kapulisan may kaangtanan sa pag-conduct sang buy bust operation.

Sa pagpangusisa sang Aksyon Radyo Iloilo, nahibaluan nga upod ni Animas sa iya gina-arkilahan nga kwarto ang duha niya ka kabataan kag asawa.