Guba na ang vault sa diin nakatago ang P25,000 nga benta sang motorcycle shop sang ginransak sa Barangay 1, San Miguel las-12:28 kahapon sang kaagahon,Enero 3.
Suno kay Police Captain Bryan Alejo, officer-in-charge sang San Miguel Municipal Police Station, na-capture sa CCTV camera ang pagdulog sang duha ka mga motorsiklo sa atubang sang establisimento.
Duha ang sakay sang isa ka motorsiklo samtang isa lang ang sa isa pa.
Nagpanaog ang duha ka mga sakay sang isa ka motorsiklo kag ginliso kag ginkakas sa saksakan ang CCTV camera gani wala na nakita ang masunod nila nga ginhimo.
Mga las-7 sang aga sang mamukas na sang establisimento ang empleyado, guba na ang kandado sang isa ka roll up door.
Pagsulod, nakita nga bukas naman ang mga drawers pero wala sang ginkuha ang mga nagpangawat.
Nagapadayon ang imbestigasyon sang kapulisan agud makilal-an ang mga suspetsado. — Aksyon Maria Kayla Tingzon
