ILOILO — Arestado ang nagabaligya sang utan sang nakuhaan sang pusil kag bala sang naga-roving nga mga pulis sa Brgy. 14 Poblacion, San Miguel Disyembre 16 sang kaagahon.
Suno kay Police Captain Bryan Alejo, officer-in-charge sang San Miguel Municipal Police Station, naga-inum inom si alyas Jan, 27-anyos upod ang iya abyan lapit sa plaza tungod sa selebrasyon sang Kandingan Festival.
May gin-deploy nga mga pulis sa plaza agud mapabilin ang kalinong kag katawhay sang kahiwatan.
Na-notisyaran sang naga-foot patrol nga mga pulis ang sling bag ni Jan nga nakabukas kag may nagalabaw nga handle sang pusil.
Tungod sini, ginpalapitan sang mga pulis ang suspek agud mausisa sang gulpi nagdalagan pakadto sa direksyon sang Alimodian pero ginlagas sang mga pulis kag nadakpan.
Sang nadakpan, nakuha ang sling bag sa suspek kag nakit-an sa sulod ang calibre 45 nga homemade pistol kag magazine nga may mga bala.
Ginpahayag sang suspek nga halin sa iya pakaisa ang pusil kag masami niya ginadala kon magkadto sa uma, base sa pagpangusisa sang mga pulis.
Gin-aresto ang suspek kag preso sa custodial facility sang San Miguel Municipal Police Station samtang ginaproseso ang pagpasaka sang kaso nga paglapas sa Republic Act 10591 ukon ang Comprehensive Firearms and Ammunition Regulation Act. — Aksyon Paula Elambayo
