ILOILO CITY — Nagasaylo-saylo sang ginatiniran ang 26-anyos nga nagabantay sang mga inugbulang nga manok agud indi gilayon ma-monitor ang iya illegal nga aktibidad.
Ini suno kay Police Major Marvin Villanueva, deputy chief sang Regional Police Drug Enforcement Unit 6 (RPDEU) sang nadakpan ang subject sa drug bust operation sa Brgy. Calumpang, Molo kahapon sang kaagahon.
Paagi sa confidential informant, na-monitor ang aktibidad sang subject nga si alyas Boss kon sa Molo nagatinir samtang alyas Mike kon magkadto siya sa Guimaras sa balay sang iya asawa, suno kay Villanueva.
Ginabaligya sang subject ang illegal drugs sa Iloilo City kag sa Guimaras.
Gina-monitor sang mga pulis ang source sang subject.
Na-recover ang 80 grams nga kabug-aton sang suspected shabu kag nagabalor sang P544,000. — Aksyon Paula Elambayo
