ILOILO CITY — Dead-on-arrival sa ospital ang 26-anyos nga nagapangkay-o cellphone sang ginbuno sang amay sang iya live-in partner sa Barangay San Juan, Molo mga las-9:45 kaina sang aga.
Suno kay Punong Barangay Jose Martin Maloto, nag-report kaina sang aga sa barangay si alyas Puyo, 42-anyos, amay sang 17-anyos nga live-in partner nga babaye sang biktima nga si alyas Toto tungod ginasakit niya.
Ginpatawag ni Maloto si Toto agud gilayon nga ma-settle ang ila reklamo.
Pag-abot ni Toto wala ang iya live-in partner gani ginhambalan ni Maloto ang ginikanan nga tawgon man ang ila bata.
Samtang nagahulat nga makaabot ang iya live-in partner, nagpauli anay si Toto.
Sang nakaabot na ang live-in partner ni Toto, ginpasugat siya ni Maloto sa duha niya ka mga tanod sakay sa tricycle.
Pabalik na kuntani ang mga tanod upod si Toto sang wala nila matalupangdan nga nagsakay sa likod sang tricycle si Puyo kag ginbuno sa likod si Toto.
Nakaagum si Toto sang tatlo ka pilas sang pagkabuno sa likod kag duha sa dughan nga amo ang gintunaan sang iya kamatayon.
Nagapabilin nga at-large ang suspetsado.
