ILOILO — Napatay samtang ginabulong sa ospital ang 46-anyos nga babaye sang nabungguan kag naipit sang pick-up sa Brgy. Ungka II, Pavia kagab-i.
Suno kay Police Captain Ritz Field Presquito, officer-in-charge sang Pavia Municipal Police Station, nagtabok sa dalan ang babaye sang wala natalupangdan sang driver sang pick-up gani nabungguan kag naipit.
Dugang pa ni Presquito, posible wala natalapungdan sang driver sang pick-up ang babaye tungod sa mamunog nga ulan kagab-i.
Halin sa Sta. Barbara ang pick-up kag papuli na sa Pavia sang natabo ang aksidente.
May pilas sa nagkalain-lain nga parte sang iya lawas ang biktima, suno kay Presquito.
Detained sa Pavia Police Station ang babaye nga driver sang pick-up samtang ginahingagaw ang pagpasaka sang kaso nga reckless imprudence resulting to homicide. — Aksyon Paula Elambayo
