Una nga gin-report na-missing ang negosyante nga nasapwan patay sa suba sa Barangay Poblacion, Calinog las-8 kaina sang aga.
Suno kay Police Major Myles Dieron, hepe sang Calinog Municipal Police Station, Disyembre 24 sang udto sang naghalin sa ila balay sa Tapaz, Capiz ang nasapwan nga si Jovic pero wala sang ginhambal sa iya asawa kon diin makadto.
Wala nakapauli si Jovic tubtob Disyembre 25 gani gin-report sang pamilya ang iya pagkadula.
Nag-coordinate ang Tapaz police sa Calinog police sa posibilidad nga nakalabay sa ila banwa si Jovic gani ginpangita.
Aga sang Disyembre 25 may nakita nga gin-abandonar nga motorsiklo kag yara pa ang liyabe, sa ibabaw sang taytay sa Barangay Poblacion.
Ginpakita ini sa asawa ni Jovic kag ginkumpirmar nga ginapanag-iyahan sang iya nga bana ang motorsiklo. Ginbuksan sang asawa ang motorsiklo kag nakita ang sulat nga naga-unod sang pagpamilinbilin sang iya bana.
Base sa CCTV footage nga nakuha sang mga pulis las-7 sang gab-i sang December 24 nakita nga naglumpat si Jovic sa suba.
Indi athag sa footage ang hitsura sang naglumpat pero nagapati ang asawa ni Jovic nga siya tungod malapit sa lugar sa diin nakita ang iya motorsiklo.
Disyembre 26 ginpangita sang kapulisan kag mga personnel sang Municipal Disaster Risk Reduction and Management Office (MDRRMO) si Jovic pero wala nakita.
Nag-resume ang pagpangita sa iya kaina sang aga kag nakit-an siya sa suba, mga isa ka kilometro ang kalayuon sa diin siya naglumpat.
Nagakulob ang iya lawas sang nakit-an kag kumpleto ang iya panapton.
Wala sang pilas tuga sang pagkabuno, labo ukon tiro si Jovic.
Indi na pagpa-autopsy sang pamilya ang bangkay sang ila himata tungod nagapati nga wala sang foulplay ang iya kamatayon.
