Ginkaakig sang No to PUV Phase Out Coalition Panay ang indi pagpabor ni President Ferdinand Marcos, Jr. sa panawagan sang mga senador nga temporaryo i-suspend ang implementasyon sang Public Transport Modernization Program (PTMP).
Suno sa lead convenor sang grupo nga si Mr. Elmer Forro, anti-people ang desisyon sang pangulo tungod mas ginpaboran niya ang mga dalagko nga supplier sang modernized units, mga bangko, kag mga lideres sang mga kooperatiba.
Indi man matuod suno kay Forro ang pahayag ni Marcos nga 80% na sang mga PUVs sa pungsod ang naka-comply sa requirements sang modernization program tungod kalabanan sa mga operators nga nagpamiembro sa mga kooperatiba ang napilitan lang agud indi sila madulaan sang palangabuhian.
Magasapol pa ang gruro ni Forro sa iban pa nga mga miembro sang coalition agud ma-istoryahan ang ila masunod nga mga aktibidad may kaangtanan sa ila kawsa.
Una na gin-athag ni Forro nga wala sila nagapamatok sa PUV modernization program apang dapat suno sa iya nga i-review ang programa agud mapatuman sang insakto.
