ILOILO CITY– Liwat nga nag-operate ang Public Safety and Transportation Management Office (PSTMO) upod sa kapulisan batok sa mga salakyan kag motorsiklo nga may magahod nga tambutso.
Suno kay PSTMO head Jeck Conlu, nag-umpisa ang ila operasyon las-9:30 sang gab-i, Enero 3, sa Diversion Road bangud isa ini sa mga lugar nga na-identify nga ginalabayan sang mga salakyan nga may magahod nga tambutso.
Wala ginpahibalo sang PSTMO ang pag-conduct nila sang checkpoint agud indi makalikaw ang mga motorista. Tubtob kaagahon ang ila operasyon kag magapadayon sa masunod nga adlaw.
Sa initial data sang PSTMO, 15 ka drivers ang gin-issuehan sang citation ticket kag kalabanan nga rason amo ang paggamit sang open muffler kag wala sang helmet para sa mga nagadala sang motorsiklo.
