ILOILO — Nakumpiskar ang suspected shabu nga nagabalor P12.2 million sa drug buy bust operation sa Barangay Aldeguer, Sara kagab-i, Nobyembre 15.
Suno kay Police Major Dadje Delima, head sang Provincial Drug Enforcement Unit (PDEU) bag-o lang nakakuha sang supply sang illegal nga druga ang subjects nga kanday alyas Che-che, iya live-in partner nga si Alyas Nonoy kag manghod nga si alyas Raul kag i-distribute na kuntani nila sa quinto distrito sang natabu ang ila transaksyon amo nga daku ang recoveries.
Ginpabutyag ni Delima nga nakaagi na dakup si alyas Che-che sang tiempo pa sang anay PDEU head kag nakaguwa tungod nakapiyansa.
Dugang ni Delima nga antes ang transaksyon, sa Terser Distrito nagkuha sang supply sang illegal nga druga ang subjects.
Wala nagapareho ang lugar sa kada transaksyon sa diin ginakuha sang subjects ang illegal drug items, suno kay Delima.
Sa monitoring sang mga pulis, nagagamit sang ginaarkilahan nga salakyan ang mga subjects agud indi masundan ang ila illegal nga transaksyon.
Ginakabig naman nga daku nga supplier sang illegal nga druga si alyas Che-che sa diin naga-supply siya sang illegal nga druga sa Segundo Distrito pakadto sa Quinto Distrito.
23 ka sachets kag 11 ka dalagku nga pinutos sang suspected shabu nga ginabanta nagabug-at sang 1.8 kilograms ang nakuha sa operasyon. — Aksyon Maria Kayla Tingzon
