ILOILO — Nakuhaan sang P2.5 million nga balor sang suspected shabu ang mangunguma nga subject sa drug bust operation sa Barangay San Antonio, Ajuy kagab-i.
Suno kay Police Captain Aileen Lacrite, officer-in-charge sang Ajuy Municipal Police Station, na-monitor nila nga bag-o lang kuha sang stock sang illegal nga druga ang subject nga si alyas Mon, 36-anyos gani ginhimo ang operasyon kag napunggan ini nga maglapta pa.
Na-recover sa operasyon ang 362 grams nga suspected shabu.
Gin-monitor sang kapulisan si Mon sa sulod sang tatlo ka bulan sang nagguwa ang ngalan niya nga source sang mga subjects nga una na nagkaladakpan sa lugar.
Dugang pa ni Lacrite nga may impormasyon na sila kon diin ang source sang subject pero wala niya ginbuyagyag.
Ginpabutyag man niya nga malapit sa eskwelahan ang balay sang subject kag ginkahangaw-an man nila ang posibilidad nga mangin parokyano niya ang mga estudyante amo nga gintinguhaan nga mapadasig ang paghimo sang operasyon. — Aksyon Maria Kayla Tingzon
