ILOILO — Ginalantaw sang kapulisan nga itigana kuntani sa Dinagyang Festival ang na-recover nga P2.7 million nga balor sang suspected shabu sa drug bust operation sa Barangay Cabugao Sur, Sta. Barbara las-2:40 kaina sang hapon.
Naglab-ot sa 410 grams ang kabug-aton sang suspected shabu nga na-recover sa operasyon.
Suno kay Police Major Marvin Villanueva, deputy chief sang Regional Police Drug Enforcement (RPDEU), nagaserbe nga bodegero sang illegal nga druga ang subject nga si alyas Tol, 42-anyos nga taga-Tagbak, Jaro pero temporaryo nga nagadayon sa nasambit nga barangay.
Dugang ni Villanueva, ginadul-ong sang subject sa iya mga parokyano sa Iloilo City kag kaiping nga mga banwa ang illegal nga druga kag may mga tion man nga ginapakadto niya sa balay nga iya ginadayunan ang mga nagabakal nga kilala kag ginasaligan niya.
Padayon nga gina-usisa sang kapulisan ang subject agud mahibaluan kon diin ang source sang illegal nga druga nga iya ginabaligya. — Aksyon Maria Kayla Tingzon
