Na-recover ang P3.4 million nga balor sang suspected shabu sa drug buy bust operation Brgy. San Jose Ward, Pototan las-7:25 kagab-i.
Ginkilala ang subject kay alyas Wilfredo 52-anyos sang Brgy. Iwa Macatol, Pototan kag alyas Jun 45-anyos residente sang Brgy. Poblacion, Altavas, Aklan.
Suno kay Police Captain Glenn Soliman, head sang Regional Police Drug Enforcement Unit (RPDEU) 6, ginakabig “bodegero” sang illegal nga druga ang subject nga si Wilfredo samtang naga-upod sa mga transaksyon si Jun.
Sa monitoring sang police nga naglab-ot masobra isa ka bulan, natukiban nga sa Iloilo City nagakuha sang supply sang illegal nga druga ang mga subjects nga ila naman ginabaligya sa nagkalain-lain nga parte sang banwa.
Na-recover ang pito ka dalagko nga pinutos sang suspected shabu nga ginabanta nagabug-at sang 510 grams.
Magluwas sini, may nakuha man nga .38 revolver kay Wilfredo.
Yara na sa kustodiya sang Pototan Municipal Police Station ang mga nadakpan samtang ginahulat ang resulta sang drug test. — Aksyon Maria Kayla Tingzon
