ILOILO CITY— Tatlo ang nadakpan sa drug buy bust operation kahapon, Enero 22 sa Dela rama compound, Brgy. Zamora-Milleza, City Proper.
Ginkilala ang mga nadakpan kanday Rexston Amoroso, 30-anyos nga una nakapalagyo sa operasyon; Ricsie Biclar, 33-anyos nga tricycle driver; kag Joel Abada, 42-anyos nga e-bike driver nga lunsay residente sang amo man nga barangay.
Nagdalagan si Amoroso sang namutikan nga police ang iya katransaksyon kag nag-agi sa gamay nga alagyan sa ila nga kuwarto kag naglumpat sa pihak nga pader.
Gilayon naman nga nadakpan sang police si Amoroso sa amo man nga barangay.
Suno kay Police Lieutenant Colonel Antonio Benitez Jr, updanay ang tatlo sa pagbaligya sang illegal drugs.
Kun maka-contact ang manugbakal sa tatlo, puwede sila makakadto sa balay ni Amoroso, suno kay Benitez. Posible man nga naga-repack sa balay ang tatlo.
Ginpabutyag ni Benitez nga ang gamay nga alagyan sa kwarto ni Amoroso ang ginhimo nila bilang preparasyon kun may maglagas sa ila nga police.
Bug-os nga syudad naga-deliver sang illegal drugs ang tatlo, base sa duha ka bulan nga monitoring sang police.
Kaina sang hapon, na-recover ang 21 ka sachets sang suspected shabu nga ginabanta more or less 500 grams kag may estimated market value nga P3.4 million.
Base sa impormasyon sang police, si Amoroso ang suspect sa pagtiro kay Douglas Salgado sang Enero 1 sang kaagahon sa amo man nga barangay nga nakapalagyo.
