ILOILO— Na-recover ang P3.5 million nga balor sang suspected shabu sa mag-live in partner nga nadakpan sa drug buy bust operation sa Tanza Bonifacio, City Proper kagab-i, Disyembre 19.
Ginkilala ang mga subjects kanday Jona Rose Espinas nga tumadok sang amo man nga lugar kag Kim Roger Pahunao nga residente sang Barangay San Juan, Molo.
Suno kay Police Lt Colonel Antonio Benitez Jr, head sang City Drug Enforcement Unit, isa ka bulan nila nga gin-monitor ang illegal activities sang duha tubtob nadakpan kagab-i.
18 ka sachets sang suspected shabu nga nagabug-at sang 520 grams ang na-recover sa duha ka mga nadakpan, suno kay Benitez.
Sa pagpangusisa sang police, madamo sang koneksyon sa Muntinlupa si Pahunao ilabe na sa iya tiyo nga napreso nga ginakuhaan nila sang suspected shabu.
Ginpabutyag ni Benitez nga ang mag-live-in mismo ang nagadul-ong sang illegal drugs sa mga nagabakal sa ila sa Iloilo City kag probinsya.
Ginpahayag naman ni Punong Barangay Nelson Panaligan nga wala naga-istar sa ila barangay ang mag-live-in kag apat tubtob lima pa lang ka adlaw nga nanotisyaran niya nga nagakadto sa ila lugar.
Balay sang tatay ni Espinas ang ginatineran nila sa Tanza Bonifacio.
Nagpamalibad nga maghatag sang pahayag ang duha ka mga nadakpan.
