ILOILO—Na-recover ang P3.5 million nga balor sang suspected shabu sa mag-live in partner sa Taft St., Brgy. Zone 4, Sta. Barbara kahapon sang aga, Hulyo 29.
Base sa report sang Philippine Drug Enforcement Agency (PDEA) 6, ginkilala ang mga nadakpan kanday Salvador Ruiz, 33-anyos sang Brgy. Isidro, Jaro kag Vanessa Buison, 36-anyos sang Brgy. Rizal Pala-Pala, City Proper.
Sa operasyon sang PDEA 6, PDEA Iloilo Provincial Office, kag Sta. Barbara Police, nabaklan ang duha sang tatlo ka magagmay nga sachets sang suspected shabu.
Na-recover pa gid ang dugang nga lima ka bulto sang suspected shabu, suno sa police.
Ginabanta nagabug-at sang 515 grams ang tanan nga illegal drugs nga nakumpiskar sa duha.
Suno kay Police Major Jose Rey Pabalan, hepe sang Sta Barbara Municipal Police Station, lima ka adlaw nga gin-monitor ang illegal activity sang duha antes gin-operate.
Ginahibalo pa sang mga otoridad kun diin nagakuha sang supply sang illegal nga druga ang mga nadakpan.
