ILOILO CITY — Naglab-ot sa P4.7 million nga balor sang suspected shabu ang na-recover sa drug buy bust operation sa Barangay Calaparan, Arevalo kahapon, Disyembre 18.
Target sa operasyon si alyas Baks, 37-anyos kag nadakpan man kanday alyas Omar, 51-anyos kag Mads, 56-anyos nga upod niya sa pagbaligya sang illegal nga druga.
Lima ka gagmay nga mga sachets kag siyam ka dalagko nga pinutos sang suspected shabu nga ginabanta nagabug-at sang 700 grams ang na-recover sa operasyon.
Suno kay Police Captain Roque Gimeno III, head sang City Drug Enforcement Unit (CDEU), nagguwa ang ngalan ni alyas Baks nga isa sa mga drug personalities sa siyudad tungod may mga subjects sa ila previous operations nga nakasugid nga sa iya nagakuha sang supply.
Dugang ni Gimeno, daku nga bulig ang impormasyon kag kooperasyon sang mga pumuluyo sa pagkadakup sa mga subjects agud maka-establisar sila sang koneksyon tungod ginapili lang ni Baks ang iya mga ginabaligyaan.
May contact si Baks sa New Bilibid Prison sa Manila, suno kay Gimeno, nga amo ang nagapadul-ong sang illegal nga druga sa iya balay paagi sa couriers. – Aksyon Maria Kayla Tingzon
