P40.8 million nga balor sang suspected shabu na-recover sa drug buy bust operation sa Janiuay

ILOILO–Naglab-ut sa P40,800,000 nga balor sang suspect shabu nga nagabug-at sang 6 kilos ang na-recover sa drug buy bust operation sa Sitio Siga-Siga, Brgy. Don T. Lutero East, Janiuay, Iloilo kaina sang aga.

Suno kay Police Capt. Glenn Soliman, team leader sang Regional Police Drug Enforcement Unit (RPDEU), ginkilala ang mga subject kanday alyas Nicklyn kag alyas Koy-koy nga lunsay residente sang Jaro kag ginakabig sang police nga High Value Individuals (HVI).

Ginhimo ang operasyon sa sulod sang boarding house sang mga subject sa diin nabaklan ang duha sang suspected shabu nga nagabalor sang P26,000, suno kay Soliman.

Nadakpan si Nicklyn pero nakapalagyo si Koy-koy.

Magluwas sa nabakal sa duha, na-recover sa sulod sang boarding house ang tinumpok nga sachet sang suspected shabu kag may yara man nakatago sa kisame, suno kay Soliman.

Ginsugid ni Nicklyn suno kay Soliman ang ngalan sang naga-supply sa ila sang illegal nga druga nga taga-Iloilo City pero gina-validate pa sang RPDEU.

Duha ka bulan nga gin-monitor sang police ang duha tubtob nadakpan sa operasyon kaina sang aga.

Ginpahayag ni Soliman nga ini ang pinakadako nga accomplishment sang RPDEU subong nga tuig.