Pag-renew sang prangkisa sang mga traditional jeepneys posible i-extend sang LTFRB

ILOILO CITY — Posible nga i-extend sang Land Transportation Franchising and Regulatory Board (LTFRB) ang pagpa-renew sang prangkisa sang mga traditional jeepneys.

Ini ang base sa statement sang LTFRB Central Office chairman of the board, suno kay LTFRB 6 legal counsel Atty. Salvador “Jun” Altura, Jr.

Pero ginpabutyag ni Atty. Altura nga wala pa ini sang kasiguraduhan tungod wala pa sila sang may gina-uyatan nga Memorandum Circular nga naga-ammend sa Memorandum Circular 2022-033 sa diin nakabutang nga tubtob na lang sa Marso 31 ang prangkisa kag pagpa-renew sang traditional jeepneys.

Ini kun tani ang ginalantaw sang LTFRB 6 nga temporaryo nga solusyon agud indi mabuhinan ang mga traditional jeepneys nga nagabiyahe sa syudad, samtang dyutay pa lang ang nagabiyahe nga modernized jeep sang mga kooperatiba suno kay Altura.

Sa pihak sini, padayon ang paghaylo sang LTFRB sa mga kooperatiba nga mag-acquire na sang mga modernized jeep agud may ibulos sa i-phaseout nga mga traditional jeepneys.

Sang damlag lang, nagginutok ang mga pasahero sa Mohon terminal bangud ginkulang ang nagabiyahe nga mga jeep sa Iloilo City tungod amat-amat na ini nga gina-phaseout.